Во оваа анимација погледот се упатува кон долниот дел на северниот пол на Јупитер каде може просторно да се доживее погледот кон централниот циклон на полот и осумте други циклони кои го опкружуваат. За видео клипот искористени се слики добиени од инфрацрвениот инструмент на вселенската сонда Јунона во текот на нејзините четири преминувања преку масивната планета. Инфрацрвените камери се користат за да се сними температурата на атмосферата на Јупитер и овозможуваат преглед во начинот на движење на моќните циклони на половите на Јупитер. Во анимацијата жолтите делови се потопли и подлабоки во атмосферата на Јупитер, додека темните делови се постудени и повисоко во атмосферата на Јупитер. На оваа слика највисоката, „најсветла температура“, е околу 10°C, додека најниската е околу -80°C.
Прикажувајќи го инфрацрвениот дел од спектарот, камерата ја доловува топлината како излегува од длабочината на Јупитер подеднакво добро, без разлика дали е ден или ноќ. Со инструментот се нанализира климатскиот слој на 80 до 120 километри под облаците на Јупитер. Сликите и анимацијата ќе му помогнат на тимот да ги разбере силите кои функционираат во областите околу северниот пол во кој доминира централен циклон опкружен од осум циркумполарни циклони со дијаметри од 4000 до 4600 километри.
Прелет над облациите на Јупитер и просторна претстава на ураганите на северниот пол (с) NASA/Juno
Графичка претстава на нерамномерно распределеното магнетно поле на Јупитер предизвикано од динамо ефектот помеѓу слоевите во внатрешноста (с) NASA/Juno
Научниците кои работат на мисијата Јунона на НАСА споделија просторна инфрацрвена претстава која прикажува густо насобрани циклони и антициклони кои ги исполнуваат поларните региони на планетата, како и првиот детален преглед на динамо ефектот што го предизвикува моќното магнетно поле на Јупитер, ова е прва подетална магнетна мапа за било која планета освен Земјата.
Автор: Елена Панова
RSS Feed