Кометата Панстарс У1 (Pan-STARRS C/2017 U1) навлегла до 0,25 астрономски единици до Сонцето на почетокот од септември, а на 14 октомври премина релативно близу до Земјата на само 0,15 ае. Според нејзината екстремна орбита астрономите се сигурни дека не потекнува од нашиот Сончев систем, туку доаѓа од меѓуѕвездениот простор.
Уметнички приказ на објектот додека преминува низ Сончевиот систем (с) NASA/JPL
Доколку во следните попрецизни мерења ексцентрицитетот на орбитата остане над 1 тогаш сигурно станува збор за објект кој доаѓа вон нашиот Сончев систем. Овој меѓуѕвезден објект не бил забележан пред 18 октомври, четири дена по ’најблискиот’ премин. По подетални набљудувања забележано е дека орбитата на малата 150 метарска комета е хиперболична и под многу остар агол со еклиптиката (рамнината на Сончевиот систем). Нејзината траекторија и големата брзина на движење укажува дека лесно ќе излезе од гравитациското влијание на Сонцето, што преставува прв ваков случај.
Графички приказ на орбитата на кометата Панстарс У1
Меѓуѕвездената комета наречена според телескопот со кој за прв пат е забележана, Панстарс, потекнува надвор од Сончевиот систем и претставува прв забележан интергалактички објект кој излегол од гравитациското влијание на друга ѕвезда и сега го посетува Сончевиот систем. Кометата сигурно ќе го напушти нашиот систем и никогаш повеќе нема да се врати. Со подетални анализи на нејзината патека може да се открие од која ѕвезда потекнува, моментално се знае дека е пристигната од соѕвездието Лира.
Кометата снимана 9 минути во движење. Секоја снимка е со ширина од 3 аглови минути (с) NASA
Обновено на 26 октомври @ 16:00
Именувањето и класата на објектот се променети, сега овој објект се класифицира како ’астероид’ со ознака Pan-STARRS A/2017 U1.
Обновено на 27 октомври @ 12:00
Од повеќе опсерватории независно е измерено дека овој објект Панстарс А/2017 U1 има хиперболична орбита и официјално станува првиот објект забележан во Сончевиот систем кој потекнува од друг ѕвезден систем.
Автор: Мартин Стојковски
RSS Feed