Персеиди 2016 - извештај

Фантастично шоу со метеорскиот дожд Персеиди. За време на најголемата активност на Персеидите која требаше да се случи ноќта на 11 август кај нас беше облачно и затоа набљудувањето го поместивме за наредната вечер кога сепак требаше да има барем половина од максималната активност. Во меѓувреме ги следевме извештаите што пристигаа од претходната вечер кои воопшто не беа импресивни со забележани помеѓу 20 и 30 метеори на час и ретко неколку случаеви со 40 пријавени во еден час. Поради намалениот ентузијазам за метеорска активност се понесе и телескоп за да пополни време доколку нема метеори, но метеори имаше, чија активност ја надмина просечната појава од 60 метеори на час при максимален интензитет за нашите простори во идеални услови.
И покрај тоа што во најголемата активност дел од небото беше барем 10% прекриено со високи и тенки облаци и малото светлосното загадување од Скопје ние успеавме во најактивниот час да забележиме дури 62 Персеиди и 5 спорадични метеори.
Локацијата на набљудување беше истата од лани, рамнина пред селото Љубанци, над Радишани.

Спред овие резултати локалната максимална часова стапка била 120+ што претставува барем 20% подобро од вообичаената максимална честост на Персеидите.
За цело време од набљудувањето не забележавме ниту една огнена топка, повеќето метеори беа помеѓу +2 и +3 магнитуда.

Уште една фасцинантна појава која треба да се напомене, дел од високите тенки облаци, цируси кои беа близу радијантот понекогаш светнуваа како да беа осветлени од молња при грмотевици, кои впрочем беа осветлени од позадински метеори, а ефектот беше скоро идентичен.
Дури еден Персеид беше забележан низ тесното видно поле на телескопот кој го користевме вечерта додека го набљудувавме Двојното ѕвездено јато во Персеј.

И покрај сите квази предвидувања од максимална часова стапка 200 која требаше да се случи ноќта помеѓу 11 и 12 август од страна на гатачки, бајачки и „клик-бејт“ сајтови, тоа не се оствари. Сè уште се прибираат податоците од овој метеорски дожд од Меѓународната метеорска организација, но прелиминарните резултати покажуваат дека токму во Европа биле со најголем интензитет, на Северно Американскиот континент повеќето од набљудувачите не виделе повеќе од 30 метеори на час.

Персеидите во 2016 беа навистина фасцинантни и вистинско уживање под ѕвезденото небо, имавме среќа со временските услови кои беа одлични да се проследи овој преубав феномен. Дури и поискусните набљудувачи велат дека не виделе ваков метеорски дожд последниве 15 години.

Најдобрите фотографии од Персеидите во 2016

*овој сегмент ќе се обновува во наредните неколку дена како што се објавуваат нови фотографии

Сјаен метеор болид уловен од Охрид на 11 август 2016. Од фотографијата се гледа дека метеорот имал неколку блесоци додека согорувал (с) Славе Стојановски

Опсерваторијата Тејде на Тенерифе, Канарски орстови, Шпанија ноќта помеѓу 11 и 12 август 2016 (с) Ángel R. López Sánchez

Не, ова не е трага од авион. Ова е трага што оставил голем и силен Персеид болид на 9 август 2016, Њу Хемпшир, САД (с) Vytas Cerniauskas

Персеид над Коринтскиот залив, Грција во средината се гледа мостот Рио-Антирио (с) Alexandros Maragos

Персеиди 2016 на ливада среде Русија снимени во една вечер помеѓу 11 и 12 август 2016 (с) Boris Dmitriev

12 агуст 2016 (с) Jose Jimenes

Неколкучасовно снимање на Персеидите на 11 - 12 август од езерото Мусхорн, Јута каде се гледаат 125 метеори. Зелениот сјај не е од аурора, туку воздушен сјај од најгорните делови на атмосферата (с) Eric Benedetti

Метеорска активност од Персеиди, Млечен Пат, Андромеда и Плејади над ветерници на планината Патра во Грција (с) Alexandros Maragos

Огромна случајност или вообичаено за ноќ со стотици метеори. Снимено на 12 август 2016, но сепак овој метеор не припаѓа на семејството Персеиди, можно е да е залутан Делта Акварид (с) Fritz Helmut Hemmerich

Романтична вечер под Персеидите (с) Yuri Zvezndy

Огнена топка од Персеид кој оставил јонизирана трага во горните делови од атмосферата. Долните секвенци се од првите 3 минути по појавата на метеорот (с) Jeremy Perez

2016 Perseid Fireball from Jeremy Perez on Vimeo.

Композитна фотографија од Персеидите на 11 и 12 август. Од десна страна се гледа еден Персеид чија јонизирана трага се ширела кон исток поради струењата во атмосферата (с) Grant Collier

Утрото на 12 август во јужна Атика, Грција. Радијантот е зад камерата, затоа метеорите се скоро паралелни меѓу себе (с) Christos Doudoulakis

Ливив област, Украина (с) Ihor Khomych

Два Персеида, едниот многу блед, а другиот огнена топка со блесок на крајот (с) Fernando Cabrerizo

Метеори набљудувани од Меѓународната вселенска станица:

Панорамска фотографија од Персеидите во централен Стокхолм, Шведска (с) Peter Rosén

Интересен колаж од 88 метеори снимени од двор во Западен Сасекс, ВБ (с) Peter Lawrence

Харшкут, Унгарија (с) Monika Landy-Gyebnar

Кампирање под Персеиди со стартреил на 11 август 2016 (с) Derek Kind

На 12~13 август Персеидите на Американскиот континент не биле толку бројни (с) Joshua Snow

Утрото на 12 август во Тоскана, Италија (с) Gang Wang

Езерото Брејнард во Колорадо 11 - 12 август 2016 (с) Grant Collier

Персеид и сребренести облаци во Ракила, Финска (с) Satu Juvonen

Национален парк Грасленд, Јужна Каролина, 11 - 12 август 2016 (с) Alan Dyer

Персеиди 2016, езеро Канас, Кина. 45 метеори и една огнена топка со разлеана јонизирана трага. Езерото Канас се наоѓа на граница помеѓу Кина, Монголија, Казахстан и Русија (с) Zhuoxiao Wang

Обновено на 19 август @ 18:30

Сигурно најимпресивната фотографија снимена за време на метеорскиот дожд Персеиди овој пат во полн спектар на бои, иако овој метеор не потекнува од Персеидите, според насоката на движење најверојатно е Делта Акварид многу помалкуброен метероски дожд чија активнот беше десетина дена порано (с) Fritz Helmut Hemmerich

Широкоаголна фотографија од погорниот настан додека метеорот минува низ Андромеда (с) Fritz Helmut Hemmerich

Персеиди над Мауна Кеа (с) Rogelio Bernal Andreo

Персеиди над MAGIC телескопите за високо енергетски честици на Канарските острови (с) Daniel López

Кон југ каде се наоѓа средишниот дел на Млечен Пат 12 август, Вест, САД (с) Jeff Sullivan

Кон север каде се наоѓа радијантот во соѕвездието Персеј 12 август, Вест, САД (с) Jeff Sullivan

Композитна фотографија од 2 часа фотографирање. Езеро Свитјаз, Украина (с) Ihor Khomych

Овој автор прераснува во одличен астрофотограф, снимано на 12 и 13 август на планината Четири Моми во Кина. Персеидите претставени со некои од најпознатите маглини (црвенкастите дамки) во Млечен Пат и од десна страна се забележуваат Плејадите (с) Alvin Wu

Персеиди над паркот Јосемити, САД (с) Mike Shaw

Од брана кај Верзаска на италијанските Алпи, 12 август 2016 (с) Gianni Krattli

Убава широкоаголна композиција снимена на 12 и 13 август од Намибија, радијантот е ниско над северниот хоризонт поради географската ширина која се наоѓа на 22° ЈГШ. Од десна страна се забележува соѕвездието Орион и под него зодијачката светлина која се протега сè до горниот лев агол, во централниот дел се забележува Андромеда (с) Juan Carlos Casado

Обновено на 20 август @ 15:30

За време на набљудување и фотографирање на Персеидите во кинеската провинција Гуангдонг забележале редок пример на атмосферско празнење кон најгорните слоеви од атмосферата налик на црвена самовила само со многу повиска енергија. Овој пат црвената самовила е придружена со син млаз (с) Phebe Pan

Персеиди 2016 во Зелена Гора, Полска (c) Jiri Ostrižek

Персеиди над азиски храм во Кина (с) Tony Pan

Сјаен болид кој оставил неколку минутна јонизирана трага (с) Nando Harmsen

Панорамска фотографија од Персеидите (с) Jiajie Zhang

Како некој да вклучил ворп погон. Во централниот дел е радијантот од каде поминува Млечен Пат, горе десно е Андромеда, доле-десно се Плејади а се забележува и интензивен воздушен сјај (с) Eric Benedetti

Обновено 22 август @ 22:30

Петар Хоралек и оваа година со фасцинантна панорама со 104 метеори од кои 94 од нив уловени за 5 часа. Најсјајниот метеор бил од -8 магнитуда (с) Petr Horalek