Откриена е планета околу Барнардовата Ѕвезда која е оддалечена само 6 светлосни години од нас. Овој систем е вториот најблизок до Сончевиот систем по Алфа Кентаур ѕвездениот систем кој е составен од дури три ѕвезди, пред две години беше откриена карпеста планета околу Проксима Кентаур. Новата планета е (не)вообичаено наречена Барнардова Ѕвезда б бидејќи на имињата на сите откриени егзопланети се додаваат букви од латиничното писмо на името на матичната ѕвезда.
Уметничка претстава на површината на Барнардова Ѕвезда б (с) ESO/M. Kornmesser
Планетата Барнардова Ѕвезда б е карпеста планета од класата на супер-земји, има околу 3,5 земјени маси и орбитира околу својата ѕвезда на секои 233 дена. Барнардова Ѕвезда спаѓа во класата на ѕвезди црвени џуџиња чија маса е само 15% од Сонцето. Поради бледиот сјај, енергијата која ја добива планетата е само 2% од енергијата која ја добива Земјата од Сонцето.
Уметничка претстава на Барнардовата Ѕвезда б која обитира околу Барнардовата Ѕвезда (с) ESO/M. Kornmesser
Планетата е 5 пати пооддалечена од населивата зона каде би можело да се појават услови за течна вода на површината. Поради овие услови на површината на Барнардова Ѕвезда б е во вечен мраз при температури од околу –170 ℃. За можни услови за живот би можело да се шпекулира само под кората од неколку километри вечен мраз, доколку доколку има доволни количества мраз на површината.
Преку овие набљудувања исклучена е можноста да постои голема карпеста планета во населивата зона, а доколку постои таа би била барем 10 пати помалку масивна од Земјата.
Барнардова Ѕвезда е двојно постара од Сонцето и релативно неактивна во однос на други црвени џуџиња и има најголема брзина на движење во однос на нашата позиција. Научниците се 99% сигурни дека планетата постои, а користени се најпрецизните телескопи за нејзино откривање вклучувајќи го Многу големиот телескоп во Чиле. Во иднина ќе продолжи анализата на оваа ѕвезда во случај да има лажни заклучоци поради нејзината периодична активност што е малку веројатно.
Планетата е откриена преку доплеров ефект, додека планетата орбитира околу ѕвездата предизвикува мали отстапки во нејзиното радијално движење, а со тоа и црвено односно сино поместување на светлината. Поради големата прецизност на инструментите можно е да се забележи отстапка на движењето на ѕвездата од само 3,5 km/h што е еквивалент на брзина на пешачење.
Автор: Кристијан Шишковски
RSS Feed