Нова геолошка сонда на Марс

На површината на Марс беше успешно приземјена површинската сонда Инсајт чија намена е истражување на внатрешноста на планетата. Со оваа сонда ќе имаме подобра претстава за структурата на внатрешноста на Марс, дебелината на кората и внатрешната обвивка, големината и цврстината на металното јадро, температурата на нејзината внатрешност, динамиката на ладење на планетата, честоста на појава на земјотреси (марсотреси?). Некои од инструментите на Инсајт може да забележат треперење на површината во димензии од само еден атом.

Уметничка претстава на сондата Инсајт заедно со сеизмолошките и геолошките инструменти на површината на Марс (c) NASA/InSight

Во времето на спуштање на сондата на Марс сите податоци беа примо-предавани преку две мали летала Марко А и Б кои беа лансирани заедно со сондата Инсајт, но за разлика од сондата тие само прелетаа покрај Марс и ќе останат во хелиоцентрична орбита. По пренесувањето на сите податоци од вчерашното слетување овие кубсати (коцкасти сателитчиња) ќе бидат комплетно неупотребливи.

Првата снимка добиена само неколку минути по слетувањето (с) NASA/InSight

Снимка на Марс од еден од малите сателити Марко Б снимена со основна камера слична на тие што ги имаме во смартфоните. Снимката е направена на оддалеченост од само 8.000 км од Марс (с) NASA/InSight/MarCO

Снимка од камерата која ќе помага да се поставуваат инструментите покрај неа и роботската рака која ќе помага при поставување на истите (с) NASA/InSight

Само неколку минути по слетувањето ја добивме и првата фотографија снимена од сондата, каде се забележува рамниот пејзаж и ситните честички прилепени на заштитната фолија од објективот. Заштитната фолија ќе биде отстранета во текот на оваа седмица. Иако на сликата не се забележува многу, се гледа дека околината е сосем рамна, оваа локација е одбрана токму поради тоа за слетувањето да биде што е можно по лесно. На Инсајт се наоѓаат две камери, нивната позиција нема да се менува бидејќи оваа сонда е статична.

Оваа мисија е предвидена да трае до крајот на 2020 година.

Автор: Мартин Стојковски