Последните слики кои пристигнаа од Церера прикажуваат конусна планина висока 5 км која се издига над релативно рамната површина. Моментално леталото Зора (Dawn) се наоѓа на 4.000 км над површината од каде ги сними овие особини на површината. Се гледа дека низ целата површина се појавуваат кратери, некои од нив имаат и централни испакнатини, но оваа конусна ’планина’ доминира во нејзината околина (некои велат дека повеќе им личи на пирамида).
Изглед на конусната планина висока 5 км на средина од хоризонтот (с) NASA/JPL
Мистериозната планина не е единствената карактеристика која се гледа на новите слики. Тука се веќе се побројните ситни светли дамки, повеќе шестоаголни кратери, неколку групи на линеарно поставени кратери, длабоки бразди и неколку посветли (свежи?) кратери.
Во десниот дел се забележува високата конусна планина, неколкуте светли дамки, во левиот десен агол има неколку бразди (с) NASA/JPL
Во иднина се очекува многу повеќе детали за нивниот состав и начин на создавање, бидејќи веќе идниот месец леталото Зора ќе биде во многу пониска орбита од 1.500 км од каде со помош на другите инструменти ќе ги разоткрие овие мистерии на карактеристиките на површината.
Веќе познатата голема бела дамка за која исто така сè уште не се знае потеклото и составот, се наоѓа во кратер широк 100 км. На оваа фотографија може да се забележат линеарно поставените кратери кои се паралелно ориентирани меѓу себе (с) NASA/JPL
RSS Feed