Следната недела започнува претпоследниот стадиум од мисијата Касини на НАСА која веќе 12 години го проучува кралот на прстените, Сатурн. Крајот на мисијата се ближи, која ќе заврши со уништување на леталото при навлегување во атмосферата на Сатурн на 15 септември 2017. Но пред ова да се случи останува уште еден клучен дел од мисијата која ќе орбитира во многу голема близина до грандиозните прстени.
Грандиозниот изглед на Сатурн со позадинско осветлување од Сонцето. Кликнете на фотографијата за поголема резолуција (с) NASA/Cassini
Касини ќе ги користи неговите инструменти да ги анализира честиците и гасот кои се наоѓаат во близина на главниот дел од прстените и оној последен лесно забележлив дел од Ф сегментот на прстените што е константно обликуван од две мали месечинки и со нивната гравитација влијаат на неговата форма.
Досегашните орбити на Касини и наредните 20 орбити истакнати во жолто (с) НАЅА
За време на оваа фаза од мисијата Касини воедно ќе ги направи и најдобрите фотографии од месечинките што орбитираат во самите прсени како Пандора, Дафне, Атлас и Пан. Ќе се направи и обид да се сними парвот што е произлезен од метеороидни удари во карпите што ги сочинуваат прстените со помош на позадинско осветлување од Сонцето.
Главниот дел од сатурновите прстени А, Б, Ц, Д и Ф сегментот (с) NASA/Cassini
Надворешниот дел од прстените ќе биде снимен со огромна резолуција која ќе прикаже детали со големина од 1 километар, што сепак нема да биде возможно да се набљудуваат поединечните карпи во прстените чија големина е до 30 метри. Ќе се направи обид индиректно да се забележат мали тела од неколку стотина метри со чија гравитација влијаат на структурата на прстените.
Графички приказ на траекториите на Касини, за време на последните две фази од мисијата. Со сиво се прикажани 20 орбити од мисијата што следува близу прстените и со сино прикажани последните 22 орбити од Големото Финале. Последната сринувачка патека во атмосферата на Сатурн е прикажана во портокалово (с) NASA/SSI/JPL
Откога ќе заврши овој стадиум, ќе се пристапи кон насочување на вселенската сонда во најекстремна орбита која ќе поминува помеѓу атмосферата на планетата и најблискиот дел од прстените, Д сегментот. Последниот стадиум од мисијата е наречен „Големото Финале“, кога ќе се направат неколку блиски орбити и неговата оддалеченост од последниот слој на облаците на Сатурн ќе биде на само 1500 км.
Во периодот што следува очекувајте спектакуларни снимки од оваа фасцинантна планета.
Автор: Ивана Крстевска
RSS Feed
