Инструментите на Јунона, вселенското летало кое е во орбита на Јупитер ја измери длабочината на структурата на Големата црвена дамика длабоко под облаците. Исто така беа откриени два нови радијациски појаси над екваторијалниот дел.
Снимка направена со вселенското летало Јунона од Големата црвена дамка на 11 јули 2017 година (с) NASA/Juno/Sean Doran
Компјутерски генерирана анимација од прелет над Јупитер и нурнување во неговата атмосфера според набљудувањата и мерењата направени од Јунона. Од левата страна графички е прикажана висината над и под атмосферата и температурата (с) NASA/Juno
Според податоците кои ги испрати Јунона, Големата црвена дамка е широка 16.000 километри, скоро еден и половина земјен дијаметар, а нејзините корени стигнуваат до 300 километри во длабочина на атмосферата. Јупитеровата Голема црвена дамка е огромен црвенкаст антициклон во јужната хемисфера чии ветришта струјат во насока обратна од стрелките на часовникот.
Брзините на ветриштата во циклонот се многу поголеми од било кој циклон на Земјата, таму достигнуваат до брзини до 430 км/ч. Корените на црвената дамка се 50 до 100 пати подлабоки од океаните на Земјата, нивната температура е повисока во длабочините отколку кон површината што ги објаснува струењата што ги забележуваме на површината од атмосферата.
Пресек низ горните слоеви од атмосферта на Јупитер во микробраново зрачење (с) NASA/Juno
Сè уште не се знае дали Големата црвена дамка има потенцијал да остане траен белег на Јупитер. Циклонот е набљудуван уште од 1830 година, но најверојатно постои повеќе од 350 годони. Во 19 век дамката била четири пати поголема отколку денес, а во времето на вселенските летала Војаџер во 1979 година дамката била 30% поголема од денес.
Графички приказ на екваторијалните радијациски зони што за прв пат се забележани од Јунона (с) NASA/Juno
По пристигнувањето на вселенското летало Јунона откриени се нови радијациски појаси поради големата близина на леталото со Планетата, област каде досега не било ни едно летало. Радијациските појаси се состојат од релативистички електрони кои се движат со брзина приближна на светлината. Потеклото на релативистичките електрони сè уште не е познато.
Дел од јужната хемисфера на Јупитер близу јужниот пол снимен при последниот прелет на 24 октомври 2017 година (с) NASA/Juno/Sean Doran
Досега со Јунона направени се 9 блиски прелети над Јупитер од кои во последните 8 беа вклучени научните инструменти. Овие прелиминарни научни објави се темелат само на првиот прелет над Јупитер. Следниот близок прелет ќе биде на 16 декември.
Автор: Кристијан Шишковски
RSS Feed
