Нови набљудувања од најголемиот прстен на Сатурн

Најголемиот прстен на Сатурн стана уште малку поголем. Фиби прстенот кој беше откриен во 2009 година со помош на инфрацрвениот телескоп Спицер за кој се одреди дека се простира од 7 милиони до 12 милиони км од Сатурн, сега со најновите набљудувања е забележано дека се простира од 5 милиони до 16 милиони км од оваа планета. Толку голема структура не била порано забележана поради нејзината мала густина со ситни честици, впрочем има многу поголема густина на честици прав помеѓу вас и вашиот монитор на кој го читате овој текст отколку во Фиби прстенот. Доколку овој прстен би бил видлив би бил двојно поголем од дискот на полна Месечина. Овој прстен е видлив само во инфрацрвено зрачење поради топлината која ја ослободуваат честиците што претходно ја апсорбирале од Сонцето.

Уметнички приказ на Фиби прстенот кој за прв пат беше набљудуван во 2009 г (с) NASA/Keck

Овој огромен прстен се создал од удари на микрометеороиди во истоимената месечинка на Сатурн, Фиби која има слична оддалеченост од Сатурн и слична наклонетост на орбита. Фиби има ретроградна орбита и затоа ударите со ситните честици кои орбитираат околу Сатурн се со многу поголема јачина и сите шрапнели од ударите ја ’загадуваат’ орбитата околу која се движи малата месечинка Фиби.

Малата месечинка Фиби со просечен дијаметар од 200 км. Овие фотографии се направени додека вселенското летало Касини пристигало во орбита околу Сатурн (с) NASA/Cassini

Првата фотографија од овој прстен од прав која беше направена со вселенскиот телескоп Спицер во 2009 поставена врз цртеж претставен според набљудувањата (с) NASA/JPL

Астрономите и претходно поставувале хипотези за постоење на ваков прстен откога ја виделе површинската структура на Јапет, последната сферична месечина на Сатурн која орбитира на оддалеченост од 3,5 милиони км. Нејзината површина е половина бела како снег, а другата половина многу темна. Со што оваа хипотеза е потврдена. И токму поради позицијата и големината на оваа месечина се ’чисти’ тој дел од прстенот каде и практично завршува неговата структура.

На сликата се претставени Сатурн со најблиските прстени, завршувајќи со Е сегментот од прстенот. Подолу се претставени во размер Сатурн, орбитата на Титан, орбитата на Јапет, орбитата на Фиби, и распространетоста на Фиби прстенот. Во десниот агол е месечината Јапет каде нејзината водечка страна со која орбитира околу Сатурн е извалкана со честиците од прстенот Фиби.