Избрани се научните инструменти за вселенската мисија на НАСА која треба да ја истражи месечината на Јупитер, Европа. Европа е шестата месечина по големина во Сончевиот систем со дијаметар од 3000 км. Првенствена задача на мисијата ќе биде дали има услови за живот на овој замрзнат свет и детална анализа на неговата внатрешност. Оваа мисија треба да се реализира кон средината на наредната декада, а таму да пристигне кон средината на триесетите години. Во мисијата треба да биде вклучено и преку 45 прелети од оваа ’планета’, некои од нив на само 20 км од самата површина.
Европа снимена од вселенската сонда Галилео (с) NASA
Оваа ’планета’ е привлечна за истражување поради нејзините површински карактеристики кои укажуваат дека под површината постои големо водено пространство по деталните набљудувања направени со вселенската сонда Галилео која имаше 10 прелети пред повеќе од 10 години и скорешните набљудувања со Хабл телескопот кој забележа меури од водена пареа кои биле ослободени од внатрешноста на Европа. Со ова Европа претставува најблиска дестинација за барање на живот вон нашата планета и меѓу трите објекти со најголема веројатност за да се пронајде жив свет, по сатурновите месечини Енцелад и Титан.
Детална фотографија од површината на Европа снимена од вселенската сонда Галилео (с) NASA
Избраните инструменти за оваа мисија вклучуваат камери и спектрометри со што би се одредила содржината и составот на површината, камерите ќе ја снимат целата површина со резолуција од 50 м/пиксел. Радар со кој би се одредила дебелината на површинската замрзната кора и длабочината на подповршинските океани и мориња. Магнетометар со кој би се одредила соленоста, вискозноста и длабочината на водените пространства. Ќе има и инструменти кои ќе го мерат нивото на водена пареа во близина на површината.
Внатрешниот состеав на Европа: метално јадро; карпеста обвивка; 50-150 км длабок океан; 10-30 км замрзната кора која поради ниските температури е поцврста од камен. Дијаметарот на Европа е 3.000 км (с) NASA
Во меѓувреме вселенската сонда Џуно (Јунона) треба да пристигне во орбита околу Јупитер во јули 2016 која подетално ќе ја истражи структурата, формацијата и други внатрешни процеси на Јупитер. Од друга страна Европската вселенска агенција (ESA) ќе испрати своја вселенса сонда наречена Џус (JUICE - Jupiter Icy Moons Explorer) која треба да ги истражува јупитеровите месечини Ио, Европа, Ганимед и Калисто. Лансирањето за оваа мисија е закажано за 2022 и пристигнувањето во орбита на Јупитер за 2030.
RSS Feed
