Истражувчите велат дека откриле огромен кратер под глечерите на Гренланд, ова е прв кратер откриен под ледената покривка. Кратерот се крие под 900 метри дебел слој на мраз во северозападен Гренланд со дијаметар од 30 километри. Со овие димензии се вклучува во 25 најголеми кратери на земјината кора. Објектот кој го предизвикал кратерот најверојатно бил астероид од железо со дијаметар од 1,5 до 2 километри и тежина од 12 милијарди тони чија брзина била околу 20 km/s. Се претпоставува дека ударот се случил пред 12.000 до 2 милиони години.
Кратерот за прв пат бил забележан во 2015 година кога радарски се анализирала ледената покривка над Гренланд. По анализа на радарските мапи во мај 2016 година повторно бил сниман со радар по што било многу позабележливо дека има кружна структура со обрач од повисоки релјефни делови. Потоа за време на летниот период била анализирана водата која се топи од тој регион каде биле пронајдени честички од кварцен песок што директно укажува на ефект од ударот. Најинтересно од сè е тоа што истражувачите сфатиле дека 20 тонски дел од метеоритот кој удрил на тоа место бил пронајден во 1963 година на Гренланд, а сега се наоѓа во Центарот за Геологија во Копенхаген.
Точниот период на удар сè уште не е познат, единствено се знае дека се случил за време на плеистоцен, геолошка епоха од 12.000 до 2 милиони години. Астероидни удари од вакви размери може сериозно да влијаат на климата на Земјата. Поради овој колосален удар се стопиле и испариле огромни количества на лед кои се ослободиле во Атлантикот и атмосферата. Според геолозите ударот можно е да го предизвикал леденото време при нагло опаѓање на температурите во северната хемисфера кое започнало пред околу 12.000 години.
Доколку се открие точниот временски период на астероидниот удар би можело да се откријат и последиците по климата предизвикани од овој настан.
Автор: Ивана Крстевска
RSS Feed
