Забележани се стотина делови од површината на кометата 67П/Чурјумов-Герасименко кои се богати со вода во замрзната состојба. Тие сегменти се забележани со телескопската камера на Розета кои се значително посветли од просекот на површината на кометата.

Сликите од кометата се со збогатена боја и контраст до 1000 пати за да се нагласат деловите кои содржат вода. Сите места богати со вода се наоѓаат во сенка или покрај остри гребени, каде сончевите зраци не допираат и водата може да опстои во цврста состојба. За сега не се пронајдени мразеви од јаглероден диоксид, што е и очекувано бидејќи СО2 сублимира многу побрзо и на пониска температура.

Кометата продолжува да се приближува кон Сонцето (перихел) со тоа ќе се зголеми сончевото зрачење и во тие предели се  очекуваат промени, каде во одредени услови ќе се открие повеќе мраз и ќе бидат посветли, а во одредени делови се очекува мразот комплетно да испари (сублимира) каде ќе останат само многу темни јаглеродни соединенија.

SpaceX објави видео од нивниот последен обид да го слетаат првиот стадиум на ракетата Falcon 9 на платформа сред Атлантикот.
На самиот почеток се гледа како ракетата се враќа со суперсонична брзина во слободен пад која постепено забавува до 350 км/ч поради отпорот од атмосферата, каде подоцна повторно ги пали ракетните мотори во обид да слета на платформата популарно наречена „Само прочитај ги инструкциите“.
Примарната цел на оваа мисија беше да се достави капсулата Dragon која ја снабдува Меѓународната вселенска станица, што беше комплетен успех. Слетувањето на првиот стадиум беше само концепт кој сè уште се развива. Од SpaceX велат дека се оптимисти и дека во иднина ќе го усовршат овој начин на слетување, а со тоа ќе се спаси и најскапиот дел од ракетата со што лансирањата до ниската орбита ќе станат повеќекратно поевтини.

Следниот обид на SpaceX за слетување на платформа во океанот ќе биде во недела на 28 јуни 2015 во 16:20.

Последните слики кои пристигнаа од Церера прикажуваат конусна планина висока 5 км која се издига над релативно рамната површина. Моментално леталото Зора (Dawn) се наоѓа на 4.000 км над површината од каде ги сними овие особини на површината. Се гледа дека низ целата површина се појавуваат кратери, некои од нив имаат и централни испакнатини, но оваа конусна ’планина’ доминира во нејзината околина (некои велат дека повеќе им личи на пирамида).

Мистериозната планина не е единствената карактеристика која се гледа на новите слики. Тука се веќе се побројните ситни светли дамки, повеќе шестоаголни кратери, неколку групи на линеарно поставени кратери, длабоки бразди и неколку посветли (свежи?) кратери.

Во иднина се очекува многу повеќе детали за нивниот состав и начин на создавање, бидејќи веќе идниот месец леталото Зора ќе биде во многу пониска орбита од 1.500 км од каде со помош на другите инструменти ќе ги разоткрие овие мистерии на карактеристиките на површината.